Здравствените работници во тетовската болница излегоа на протест поради неисплатени плати и регулирање на нивниот работен однос. Некои од нив велат дека работат веќе 10 години, со договор за работа, без платени придонеси и со прекинато здравствено осигурување, додавајќи дека влегуваат во третиот месец како не ги примиле платите.

Бараат трајно решение – вработување на неопределено време.

Групата која се собра пред Ургентниот центар се упати кон административната зграда на разговор со директорот Агим Бериша. Тој прими тројца претставници на кои им образложи дека чека одобрение од Министерството за финансии.

– Ние како Клиничка болница инсистираме да се реши вашиот случај. Само што не е до нас, ние сме побарале да ни одобрат од Министерство за финансии. Сме добиле одобрување од Министерство за здравство да се продолжат договорите од трети месец до 12 месец. Од Финансии уште не сме добиле, правиме напори, чекаме уште да добиеме одобрение така што ќе бидете на време исплатени – истакна Агим Бериша пред медицинските сестри и медиумите.

Според директорот, во Владата се прават напори да се најде начин сите лица ангажирани со договор на дело да добијат и вработување на неопределено време.