Српската концептуална уметница Марина Абрамовиќ, по повод отворањето на изложбата „Балкански еротски еп“ во Берлин, зборуваше за улогата на сексуалната енергија во нејзиниот живот, откривајќи дека и на 79-годишна возраст има редовен интимен живот со партнер кој е 21 година помлад од неа, пренесува „Кликс.ба“.

Во изложбата „Балкански еротски еп“ таа се занимава со балканската еротика и митови за плодноста. Изложбата неодамна беше отворена во Берлин, а на прашањето зошто токму сега се занимава со сексуалноста, таа одговори:

„Дури сега сфатив дека целата енергија што ја имаме во нашето тело е сексуална енергија. Исто така, дури сега имам доволно дистанца и мудрост да се занимавам со словенската култура.“

Таа објасни дека сексуалната енергија може да се користи на различни начини – може да се претвори во љубов и нежност, но и во агресија и насилство.

„Се занимавав со ритуали за плодност од Македонија, Албанија, Бугарија, Романија, Грција и Турција. Машките и женските полови органи се почитувале уште од осмиот до десеттиот век. Дури и при садење компири или на свадби се повикувала силата на сексуалноста. Половите органи ја симболизирале смислата на животот. Денес сè се смета за порнографија, а женското тело се изложува на срам. Тоа го сметам за многу тажно“, изјави таа.

Абрамовиќ зборуваше и за односот кон сексуалноста во младоста.

„Немав изграден однос кон тоа. Не смеев да ја напуштам куќата. Мораше да бидам дома во 22 часот, а сексот се сметаше за ‘валкан’. Како млада жена имав комплекси – мислев дека сум премногу слаба и дека носот ми е преголем. Дури на 24 години ја изгубив невиноста“, рече таа.

На 19 години одлучила своето тело да го направи „инструмент“ во своите перформанси. На прашањето кога се променил нејзиниот однос кон сопствениот изглед, таа одговори:

„Веднаш штом почнав да работам перформанси, затоа што тогаш не го претставував моето лично тело, туку универзално тело. Одеднаш ми стана неважно како изгледам, поважен беше концептот. Таа енергија целосно ме излекува.“

Тогаш го запознала својот поранешен партнер Улај. Во заедничките перформанси ја истражувале динамиката на односите – биле голи, викале еден на друг и се удирале. На крајот се разделиле во повеќемесечен перформанс на Кинескиот ѕид.

„Дури со тој период, околу 29-та година, почнав да ја разбирам еротиката. Сепак, моите дела немаа врска со еротиката – беа радикални, често поврзани со страдање и болка. Вистински почнав да уживам во своето тело дури околу 50-та година“, истакна таа.

Таа додаде дека многу жени за време или по менопаузата мислат дека нивниот сексуален живот завршил.

„Моето искуство е сосема поинакво. Имам партнер кој е 21 година помлад и имаме редовен сексуален живот. Тоа ми дава многу енергија и благосостојба. Навистина е прекрасно. Сакам да бидам пример за жените на моја возраст“, порача таа.

Според неа, задоволството во староста доаѓа преку задоволството од самата себе, а тоа започнува со мали нешта.

„Зошто сите ја кратат косата кога стареат? Косата е еротична и убава и не сакам да се откажам од тоа. Истото важи и за карминот – го користам за себе. Станувам наутро, ставам кармин и денот може да започне“, рече таа.

Таа смета дека општеството често ги поврзува долгата коса и карминот со женственоста и сексуалноста, што лесно води до опсесија со младоста.

„Никој не мора да се придржува до тие правила. Никогаш во животот не сум следела правила, па нема ни сега. Сексуално сум на врвот од својот живот. Можеби со тоа можам да бидам пример. Секогаш сум била прва – првата жена што добила самостојна изложба во Кралската академија за уметности по 264 години и првата жена што добила Златен лав на Биеналето во Венеција по 100 години. Се чувствувам како булдожер што го расчистува патот за другите жени, а сега сакам да покажам дека и во староста жените можат да чувствуваат надеж, сила и убавина“, заклучи таа.