Mанифестацијата „100.000 поети за промена“ во соработка со здружението „Контекст – Струмица“ распиша поетски конкурс за 12. издание на истоимениот фестивал. Поезијата со која ќе може да конкурираат автори од сите генерации треба да биде социјално ангажирана и да разработува теми што се поврзани со промените, глобално, но и локално.

Секој автор може да учествува со по една песна. Песните треба да се испраќаат на Фејсбук-профилот на манифестацијата или на имејлот [email protected] најдоцна до 25 август 2022 година, по што ќе бидат разгледани од комисијата којашто ја одредува организацискиот одбор, а потоа селектираните автори ќе бидат застапени во зборникот „100.000 поети за промена“ – Македонија, кој секоја година се публикува како дел од оваа програмска активност.

Mанифестацијата распиша и конкурс за дизајнерско решение на постери/плакати кои ќе бидат дел од групна изложба во рамките на фестивалот, а истите тематски можат да бидат насочени кон глобалните промени, литературата, одржливиот развој, мирот. Пристигнатите дела ќе бидат изложени за време на изложбата, која е дел од манифестацијата „100.000 поети за промена“, на 24 септември 2022 година во Струмица.

Манифестацијата „100.000 поети за промена“ е од меѓународен карактер и се одржува во повеќе светски и европски земји, а нашата држава е дел од неа уште од самиот почеток и поддржана од Општина Струмица.

(Текстот е објавен во „Културен печат“ број 140, во печатеното издание на весникот „Слободен печат“ на 6-7 август 2022)