Манчини: Половина век чекаме европска титула!
Откако не успеа да се пласира на СП 2018, репрезентацијата на Италија во квалификациите за ЕП 2020 има шест максимални победи во групата „Ј“ и со нови три бода против Грција на стадионот „Олимпико“ – Рим (20.45 часот) и дефинитивно ќе се промовира како учесник на наредниот континентален собир.
И селекторот на „аѕурите“, Роберто Манчини вели дека прво треба да се триумфира против Грција, а потоа следна негова цел наредното лето ќе биде да се прекине долгиот „пост“ кој трае веќе 51 година и ја врати Италија на европскиот врв.
– Мораме да се пласираме на ЕП, иако знаеме дека нема да биде лесно. Кога седнав на клупата на Италија, не знаев што да очекувам во наредните 15 месеци. Како и да е, беше важно да ги забрзаме нештата, нов победнички стил и запознавање со играчите. Нашата примарна цел е Европско првенство, кое во историјата сме успеале да го освоиме само еднаш. Потоа, погледите ќе бидат насочени и кон Светското првенство во Катар 2022 – рече Манчини.
Италијанците единствената европска титула ја имаат далечната 1968 година, и тоа на домашен терен кога во финалето ја совладаа тогашна Југославија. Двапати беа финалисти во 2000 и 2012 година.