Претходната препорака на Владата беше сите спортски настани и јавни собири да се одржат без гледачи до 6. март но, по денешниот состанок на Филипче со епидемиолози и стручни лица од Управувачкот комитет во Центарот за јавно здравје и Комисијата за заразни болести, тие предложија тој рок да се продолжи на уште една недела.

– Мерката се должи на фактот дека бројката на заразени со коронавирус се зголемува, и според последните податоци од Светската здравствена организација, во Европа стигна до 4.250, што е за илјада повеќе од вчера. Трансмисијата е локална, во нашиот регион има еден случај во Словенија и два во Република Српска – изјави Филипче.

Оваа препорака на Филипче, значи дека натпреварите од првата фудбалска лига, кошаркарската Суперлига, ракометната Суперлига, втор викенд по ред ќе се играат без присуство на гледачи.

Министерот исто така изјави дека утрово разговарал со мобилните оператори и заедно работат на техничко решение со кое, сите странци кои влегуваат во земјава, штом се приклучат на некоја од нашите мрежи да бидат известени со посебна порака што да преземат ако почувствуваат симптоми на коронавирус.