Македонците во Ербеле, Албанија го одбележаа празникот Преображение Господово
Денешниот голем христијански празник, Преображение Господово, кој е патрон на селската црква, го одбележаа Македонците од селото Ербеле, област Поле или Долни Дебар, кое се наоѓа во близина на албанско-македонската граница кај Дебар.
По традиција присуствуваа верници и од соседните села, како и оние по потекло од овој крај, а кои сега живеат во Македонија, во други градови во Албанија и во западноевропските земји.
Жителите од поширокиот крај од двете страни на границата, независно од верската припадност веруваат дека црквата има исцелителна моќ.
– По број сме се помалку, но традицијата не ја забораваме. Во црквата доаѓаме спроти прзникот, значи синоќа, а одбележувањето го продолживме денеска. По традиција и верување, ноќта спроти празникот, во оваа црква доаѓале не само православни туку и муслимани. Ноќта ја минувале во овој божји храм и се молат за излекување од разни болести, зашто црквата има исцелителна моќ. Голем број луѓе тука го нашле лекот за својата болест – вели жител на селото.
Црвата „Свето Преображение“ датира од 12 век, а во 1970 година, со одлука на албанските власти, е прогласена за споменик на културата.
Во октомври 2018 година Бигорски манастир подари 12 икони на црквата.