Лучано Спалети е новиот селектор на Италија и ќе дебитира против Македонија
Како што и се најавуваше, тоа сега доби и потврда, италијанската фудбалска федерација објави дека нов селектор на најдобрата репрезентација на Италија ќе биде Лучано Спалети.
Станува збор за поранешниот тренер на Наполи на нашиот Елиф Елмас со кој успеа лани да ја освои титулата во Серија А.
Дебито како селектор на Италија ќе го има на 9 септември во Скопје на Националната арена „Тодор Проески“ против Македонија во рамките од квалификациите за Европското првенство 2024.
Обврските со националниот тим Спалети ќе ги стартува од 1 септември, а потоа ќе следи и неговата официјална промоција на репрезентативниот тренинг камп.
– Му посакуваме добредојде на Спалети. На националниот тим му требаше одличен тренер и многу сум среќен што тој прифати да биде селектор на „аѕурите“. Неговиот ентузијазам и стручност ќе бидат клучни за предизвиците што ја чекаат Италија во наредните месеци – рече претседателот на италијанската фудбалска федерација, Габриеле Гравина.