Во близина на италијанскиот град Перуџа викендов избила тепачка пред ноќен клуб помеѓу две групи иселеници од Македонија и Албанија. Како што пишуваат италијанските медиуми, причината за инцидентот била поради фотографија направена без дозвола со телефон.

Вербалната расправија поради фотографијата за кратко време прераснала во физичка пресметка на улица, а учесниците се тепале со маси, столици и дрвени палки. Во тепачката учествувале и неколку романски државјани.

Италијанската полиција уапсила 11 лица на возраст меѓу 19 и 31 година, од кои пет имале криминални досиеја.

Кога двајца од учесниците, сакале да побегнат со автомобил, со голема брзина удриле 27-годишен македонски државјанин. Лицето е згрижено во болница и не е во критична здравствена состојба.

Сите приведени се префрлени во затворот „Капане“ во Перуџа и ќе се соочат со обвиненија за тешко насилство.