Лазаров: Среќен и горд сум, но цврсто стојам на земја
Кирил Лазаров на најдобар можен начин дебитираше на клупата на ракометната репрезентација на Македонија, со голема победа од 33:29 над актуелниот светски шампион Данска во квалификациите за ЕП 2022.
– Прво сакам да им се заблагодарам на моите играчи и соиграчи кои ги испочитуваа моите инструкции. Благодарност до мојот стручен тим, кој ми помогна да се подготвиме за овој натпревар. Иако ова е нов предизвик за мене и не е психолошки лесно, сепак чувствував позитивна енергија. Бев подготвен и на пораз, но најважно ми беше да го испочитуваме тоа што го договоривме. Имавме храброст да почнеме со генерација 96-98, верував во нив. Дел од ракометарите беа оспорувани, а можеби им треба и малку време да се кренат на психолошки план затоа што јас верувам во нив.Момците го испочитуваа тоа во 90%. Јас сум цел живот напаѓач, но сите овие четири дена инсистирав на одбрана. Им беше смешно затоа што јас им велам да играме добра одбрана. Среќен сум и горд за мене и цела Македонија затоа што со нас сме имале и лоши и добри моменти. Во моментов сум цврсто на земја, кажав и пред натпреварот дека се појавија двајца играчи кои заслужија да бидат меѓу овие 16, но немаше место. Сега да се наспиеме, да се одмориме и да видиме како ќе се подготвиме за мечот во Данска. Уште еднаш огромна благодарност до јавноста затоа што веруваше во нас. Ова е само почеток и јас знам што е спорт и го знам нашиот македонски менталитет – рече Лазаров по победата.