Крстевски: Би сакал да имаме некоја победа пред Естонија!
Не беше во комбинација за претходниот циклус, не отпатува за Талин поради повредата на раката. Потоа се бореше и со коронавирусот, но сега сето тоа е зад Бојан Крстевски.
Крилниот центар е повторно дел од националниот тим кој денеска ги заврши мини-подготовките во Скопје и утре заминува за Перм, во обид на кошаркарска Македонија да ѝ донесе уште едно учество на големо натпреварување како Евробаскетот 2022.
– Радува тоа што сите играчи кој ги повика селекторот се ставија на диспозиција и се на располагање за овој квалификациски циклус. Се надевам дека ќе останеме во добро здравје до „балонот“ во Перм. Секако дека е олеснителна околност што летаме директно до Перм. Заштедуваме многу на време, на промена на летови, а освен тоа, и ќе пристигнеме поодморни и посвежи во Перм – вели Крстевски.
Дали треба силите, енергијата да се остават за дуелот со Естонија кој веројатно ќе биде решавачки за нашиот пласман на ЕП, останува да се види..
– Мислам дека треба да одиграме максимално ангажирано на сите натпревари. Покажавме на првиот натпревар со Русија дека можеме да се носиме со нив, а зошто да не е така и со Италија. Секако, би сакал да имаме некоја победа пред натпреварот со Естонија. Добро е што имаме повеќе играчи на високите позиции, бидејќи играме четири натпревари за само пет дена. Ќе ни значи многу. Ќе имаме и поголема ротација и малку повеќе одмор. Очекувам пласман на Европското првенство – додаде македонскиот репрезентативец.