„Кроација рекордс“: Конески се врати дома на компакт-диск
По цели 40 години, откако „Југотон“ ја објави грамофонската плоча „Проста и строга македонска песна“, каде што поезијата на книжевниот великан Блаже Конески музички ја илустрираше големиот македонски, хрватски и воопшто, југословенски композитор Љубомир Бранѓолица, со дозвола од најголемата дискографска куќа во регионот – „Кроација рекордс“, која ги сочува снимките, поезијата на Конески е повторно меѓу слушателите.
На стогодишнината од раѓањето на човекот што толку многу направи за македонскиот јазик, а во чест на 30-годишнината на независна и суверена Македонија, благодарение на Владата на РСМ, „Везилка“ повторно ја раѓа единствената и волшебна „Проста и строга македонска песна“, овој пат во еден современ дигитален формат. За некои нови поколенија.
Во драматична интерпретација на Цветанка Трпкова, стиховите на Конески одново ечат и ежат, како да се пишувани токму за ова време. Како да се создавани токму со намера да кажат и да покажат дека не сме дрво без корен, дека „Тешкото“ е нашата судбина и нашата коб, и дека Македонците сѐ уште се борат за своите правдини.
Блаже Конески – „Проста и строга македонска песна“, во пресрет на празникот 8 Септември, како компакт-диск, читателите на „Слободен печат“ ќе го добијат со секој број на весникот, со што продолжува успешната соработка со дискографската куќа „Кроација рекордс“.
Точниот датум за овој голем дискографско-издавачки потфат, во чест на 100 години од раѓањето на Блаже Конески, 40 години од винилното издание на „Проста и строга македонска песна“ и 30 години самостојна и независна Македонија, наскоро ќе биде објавен.
(Текстот е објавен во „Културен печат“ број 94, во печатеното издание на „Слободен печат“ на 21-22 август 2021)