Кои се најлошите фудбалски насилници: Убиства, киднапирања, тепачки…
Спортистите се неизбежен предмет на обожување од страна на фановите, а популарноста на некои од нив е неверојатна. Фудбалерите спаѓаат меѓу најпопуларните спортисти, а понекогаш меѓу навивачите добиваат статус на божества.
Сепак, и меѓу фудбалерите постои некаков баланс, јинг и јанг, црно и бело, па така има и играчи кои одлучија да тргнат по другата страна на законот. Дел од нив својата слава ја добија поради насилствата во кои учествуваа и заедничко на нив им е тоа што завршија зад решетки.
Бруно Фернандес
Иако има попознати јужноамерикански голмани кои завршиле зад решетки, грозоморниот чин кој капитенот на Фламенго го стави во затвор е брутален.
Бруно Фернандес е осуден на 22 години затвор бидејќи ја киднапирал својата девојка, а потоа и ја убил. По убиството, нејзиното тело го исекол на делови и со нив ги хранел своите кучиња.
Тој беше еден од најталентираните голмани, дури беше на прагот од бразилската репрезентација, но суровото убиство засекогаш го одвои од фудбалот.
Питер Стори
Легендарниот фудбалер на Арсенал, Питер Стори одигра преку 500 натпревари за топчиите, а учествуваше и во освојувањето на двојната круна во 1971 година.
Но, надвор од терените тој беше криминалец кој на крај заврши во затвор.
Беше обвинет за фалсификување, водење на бордели, кражби на автомобили и дистрибуција на порнографски материјали поради што неколку години заврши зад решетки. По излегување од затвор, тој напиша и биографска книга за својот живот.
Џои Бартон
Бартон е еден од најконтроверните личности на англискиот но и светскиот фудбал кој два пати е осудуван на затворска казна. Најпознатиот случај е кога за време на еден тренинг додека играше за Манчестер сити влезе во конфликт со Осман Дабо. По вербалната расправија, Бартон со силен удар го удри Дабо кој падна на земја и продолжи да го удира се додека не беше спречен од шокираните соиграчи.
– Плукав крв и се ми беше матно пред очите. Не можев да сфатам што се случува во тој момент –зборуваше Дабо по инцидентот.
Адам Џонсон
Поранешниот фудбалер на Манчестер сити и Сандерленд заврши во затвор поради педофилија. Тој беше фатен со 15-годишно девојче за што доби шестгодишна затворска казна.
Сепак, Адам Џонсон беше пуштен на слобода по три години поради добро однесување. Поради апсењето, Џонсон доби отказ од Сандерленд, а по излегување од затвор, ниту еден англиски фудбалски клуб не сакаше да го ангажира фудбалерот – педофил.
