Филолошкиот факултет „Блаже Конески“ во Скопје ја најави промоцијата на книгата „Два опита (Конески и Старделов)“ од проф. д-р Иван Џепароски, која ќе се одржи на 5 март (вторник) 2024 година во Салата за седници на Филолошкиот и Филозофскиот факултет при УКИМ, со почеток во 13 часот.

Воведна реч на промоцијата ќе имаат проф. д-р Ратко Дуев и проф. д-р Владимир Мартиновски, а промотори на книгата ќе бидат проф. д-р Ана Димишковска и проф. д-р Вангел Ноневски, кои се и рецензенти на книгата.

„Монографијата ’Два опита (Конески и Старделов)‘ претставува оригинално конципирано, консеквентно изведено и длабински промислено дело, во кое е изложен врвен аналитичко-критички и херменевтички пристап кон аспектите што ги поврзуваат делата на двајцата великани на современата македонска интелектуална и книжевна култура – Блаже Конески и Георги Старделов. Повеќеслојноста на оваа монографија се изразува во фактот што таа не само што нуди драгоцени информации за нивниот живот, дело и творечки искуства, туку ги елаборира и суштинските аспекти од нивниот придонес на планот на книжевноста, книжевната критика, естетиката и филозофијата“, истакнува проф. Димишковска.

„Книгата претставува уникатен придонес кон нашата културна, филозофска и академска средина. Одбирајќи да ги претстави двајцата интелектуалци чии академски кариери биле заемно испрепелетени, авторот погаѓа во суштината на одбраната тема: овие двајца великани да се претстават не како засебни фигури (иако и таквиот пристап би бил легитимен), туку како дејци чиј ангажман бил меѓусебно испреплетен и надополнувачки“, забележува проф. Ноневски.

Промоцијата на книгата е во соорганизација на Филолошкиот факултет „Блаже Конески“ и Филозофскиот факултет при УКИМ во Скопје.