Специјалната едиција наградени автори, победници на Конкурсот за необјавена поетска книга на македонски јазик, што традиционално се распишува во чест на македонскиот поетски великан Анте Поповски, е збогатена со збирката „50 испеани приказни“, за која авторот Александар Русјаков стана годинешен добитник на престижната награда „Антево перо“.

Книгата е во издание на издавачката куќа „Три“, а наградата ја доделува Здружението за зачувување на делото на Анте Поповски – „Антево перо“ Скопје.

Книгата ќе биде промовирана во рамките на централната свеченост на Меѓународната поетско-културна манифестација „Анте Поповски – Антево перо“, закажана за 27 септември (среда), во 19.30 часот, во Музејот на македонската борба за самостојност, по што на авторот ќе му биде врачен и првиот отпечатен примерок.

Присутните посетители на настанот ќе имаат можност да проследат видео материјали со кус рецитал на академик Анте Поповски, но и снимки од негови песни во интерпретација на артистката Софија Гогова Врчаковска.

Модератор ќе биде м-р Александра Јуруковска, ќе биде прочитана Одлуката на Комисијата за наградите, а пред присутните ќе се обрати д-р Атина Цветаноска. Наградата „Антев златник“ ќе ја добијат поетесите Милена Сиљаноска и Александра Спасеска, а „Антев часовник“ ќе добие Светла Јакшиќ.

Манифестацијата се одржува во чест на творештвото на бардот на современата македонска поезија, академик Анте Поповски и е поддржана со Годишната програма за 2023 година на Министерството за култура на Република Северна Македонија.

По доделување на наградите ќе се одржи и поетско читање, во кое освен наградените автори ќе земаат учество и неколку други учесници на годинешниот конкурс. Влезот е слободен.