Кина ја предупреди Канада околу планираната посета на канадски пратеници на Тајван
Кина предупреди дека ќе преземе „силни мерки“ доколку Канада „се меша“ во Тајван, една недела откако се дозна дека делегација од канадски пратеници планираат да го посетат островот во наредниве месеци за да ги истражат трговските можности, пишува „Гардијан“.
„Ја повикуваме канадската страна да се придржува до принципот на една Кина и да го почитува суверенитетот и територијалниот интегритет на Кина“, се вели во соопштението на кинеската амбасада во Канада, испратено доцна во вторникот.
„Кина ќе преземе решителни и насилни мерки против секоја земја што ќе се обиде да се меша или да го наруши суверенитетот и територијалниот интегритет на Кина“, соопшти кинеската амбасада.
Членовите на парламентарната „група за пријателство“ на Канада и Тајван, која не добива административна или финансиска поддршка од канадскиот парламент, планирале да го посетат самоуправниот остров во октомври, изјави минатата недела либералната пратеничка Џуди Сгро.
Сгро рече дека посетата ќе се фокусира на трговијата и намерата на пратениците не била да се наруши и да предизвика проблеми за Тајван или со Кина.
Во соопштението, владата на Канада рече дека парламентарните здруженија и групите за пријателство се независни и дека ја почитува намерата на пратениците да го посетат Тајван.
Односите меѓу Кина и Западот се влошија откако претседателката на Претставничкиот дом на САД, Ненси Пелоси, го посети Тајван претходно овој месец против желбите на Пекинг.