Севернокорејскиот лидер Ким Џонг Ун е реизбран за претседател на Комисијата за државни работи, објави денес државната новинска агенција КЦНА, откако изолираната земја го свика првото заседание на своето Врховно народно собрание еден ден претходно, јавува Ројтерс.

На состанокот во Пјонгјанг се разговараше за измени на социјалистичкиот Устав, како и за изборот на претседател на Комисијата за државни работи и други државни раководни тела.

Собранието, законодавното тело на Северна Кореја кое формално ја одобрува државната политика, обично се состанува по конгресот на владејачката Работничка партија за да ги претвори партиските одлуки во закон.

На состанокот се дискутираше и за петгодишниот економски план на земјата објавен на деветтиот партиски конгрес во февруари, објави КЦНА.

Вниманието е насочено кон тоа дали Пјонгјанг ќе го ревидира својот Устав за да ја формализира политиката на Ким Џонг Ун за „две непријателски држави“ кон Јужна Кореја.

Во последниве години, Ким ја напушти долгогодишната цел на Пјонгјанг за мирно обединување и го редефинираше Југот како непријателска држава.

Ким Јо Џонг изоставена од листата на лидери

Моќната сестра на Ким, Ким Јо Џонг, ја немаше на листата на членови на Комисијата за државни работи, највисокото раководно тело во земјата, каде што таа служи од 2021 година.

Министерството за обединување на Јужна Кореја соопшти дека во моментов истражува зошто таа повеќе не е на листата, но аналитичарите велат дека овој чекор не мора да укажува на губење на влијанието.

„Нејзиното отсуство не сугерира пад на статусот, туку стратешка поделба на улогите“, рече Лим Еул-чул, професор на Универзитетот Кјунгнам, додавајќи дека помладата Ким сè уште има вистинска моќ во владејачката Работничка партија.