Казни за управителот на Кванташки пазар, за увозниците и маркетите, ќе следуваат и кривични пријави
Министерот за економија го одржа ветувањето и соопшти дека неколку увозници на овошје и зеленчук, кои ги криеле производите добиле парични казни, а глоби има и за неколку познати. Цените на зеленчукот и овошјето остануваат замрзнати по 30 април
Над 15 тони овошје и зеленчук, се одземени од трговците на Кванташкиот пазар, а компанијата Анмарк МК Дооел, која управува со пазарот на големо добила кривична пријава. Ова е епилогот од вчерашната заедничка акција на пазарните инспектори, УЈП и Финансиската полиција, соопштија на прес-конференција, министерот за економија Крешник Бектеши и Горан Трајковски, директор на ДПИ. Министерот за економија го одржа ветувањето и соопшти дека неколку увозници на овошје и зеленчук, кои ги криеле производите добиле парични казни, а глоби има и за неколку трговски синџири, меѓу кои се „Веро”, „Стокомак”, „Кипер”, „КАМ”, „Тинекс” и Миса.
-Откриени се неколку затајувања на данок над 10.000 евра, за што ќе следуваат кривични пријави. Во тек се анализите кои ги прави Финансиската полиција и до крајот на оваа недела ќе се достават и кривични пријави за одредени правни субјекти. Нема недопирливи и тоа го покажавме. Акциите ќе продолжат и сите кои нема да ги почитуваат владините одлуки ќе бидат казнети – соопшти Бектеши. Бектеши соопшти и дека ќе биде продолжена важноста на одлуката за замрзнатите цени на зеленчукот и овошјето, а тоа значи дека увозниците и трговците имаат обврска да снабдуваат 70 отсто од потребите на пазарот.
-Видовме дека одредени увозници не доставуваа соодветни количества на свежи производи и на пазарите и по маркетите. Најмасовно е кај гравот. Им порачувам да не си играат и да си ги завршат обврските ако не сакаат да им биде запленета стоката – порача Бектеши.
Директорот на ДПИ, Трајковски ги повика компаниите да дојдат и да ги земат платните налози и да си ги платат казните, во спротивно ќе се тераат судски постапки, но тогаш ќе мора да се соочат со пазарните инспектори.
-Од денес па натаму нашите колеги ќе присуствуват на секое судско рочиште како сведоци. Така ќе биде нашиот збор против нивниот, сите инспектори кои констатирале прекршок ќе се појавуваат на рочиштата, и тоа мора да биде пракса. Системот мора да профункционира – додаде Трајковски, кој не сакаше да коментира зошто досега се избегнувала оваа пракса. Од ДПИ ветуваат дека ова е само почеток и ќе продолжат контролите на сите локации низ земјава. Ќе се чешлаат и зелените пазари, иако од досегашните контроли е констатирано дека извориштето на проблемот се увозниците на големо.
-На Кванташкиот пазар затекнавме трговци кои не водат евиденција за трговија. Стоките се одземени, донирани и распределени каде што е најопходно. Јас како директор апелирам до сите економски субјекти, со време да си ги платат казните, рече Трајковски на заедничката прес-конференција.