Поранешната специјална обвинителка, Катица Јанева и шоуменот Бојан Јовановски познат како Боки 13 се добри и примерни притвореници. Двајцата ги почитуваат правилата на институцијата. Вака накусо од истражниот затвор „Скопје“ ја опишуваат општата состојба на Јанева и Јовановски, двајца од вкупно тројцата приведени за аферата „Рекет“. Третиот е Зоран Милески викан Зоки Кичеец, кој исто како и првите двајца бил примерен притвореник.

Јанева и Јовановски, според нивните бранители и најблиски, имаат нарушено здравје. Здравјето на Јанева било кревко, особено психички, и е под постојана терапија со лекови. Таа во истражниот затвор „Шутка“ е веќе 28 дена. Уште првите денови, затворската управа, постапи најпрофесионално, односно, поради тогашната нејзина состојба, вечерта на 21-ви минатиот месец не ја смести во „женското одделение“, туку во посебна соба со уште една жена.

Влошено е здравјето и на Јовановски и Милески. Двајцата неколку пати беа носени на лекарски прегледи. Адвокатот на Јовановски неодамна потврди дека Боки 13 постојано има болки во желудникот и нагони за повраќање поради претходни оперативни зафати.

Кичеец пак еднаш по негово барање беше пренесен во клиниката на Жан Митрев каде му се правеа прегледи на абдоменалниот тракт. И тој беше еднаш однесен во комплексот клиники за преглед, но бидејќи состојбата не била аларматна, исто како и Јовановски, беше враќан во притвор.

Адвокатката на Јанева, Ирена Фрчкоска, потврди дека здравствената состојба на Јанева е лоша. Јанева сака да излезе од притвор и тоа ќе се бара, соопшти вчера Фркоска. Таа најави дека ќе бара укинување на мерката притвор за поранешната специјална обвинителка. Адвокатката посочи и дека Јанева како поранешен обвинител, а не актуелен, сега не може да прави ништо и додаде:

„Ќе бараме да се брани од слобода со депонирање на соодветна гаранција во недвижен имот. Сметаме дека се отпаднати основите за притворот, бидејќи таа веќе не е е специјален јавен обвинител и не може да ја злоупотрбува својата положба и да влијае“.

Ова е дел од првичниот имот кој Јанева го има пријавено пред надлежните власти во земјава, а планира да го искористи како гаранција за замена на затворскиот за домашен притвор. Се знае дека таа поседува голем недвижен имот. Поседува земјоделско земјиште, куќа и плац во Гевгелија и во околината, два стана во Скопје, едниот 72 квадратни метри, а вториот 68 квадрати. Овие два стана се водат на име на нејзините две деца, синот и ќерката. Јанева има неколку моторни возила. Нејзино лично возило е „ровер 45“ од 2001 година, додека нејзините деца поседуваат возила „ауди А6„ и „голф 4“. Јанева поседува и возило „хингај“ кој гласел на нејзиниот покоен сопруг, а во две македонски банки има четири депозити во вкупна вредност од близу седум милиони денари.