Центарот за култура „Григор Прличев“ во Охрид во соработка со „Ансамбл Македонија“ на 19 август во галеријата на центарот ја отворија изложбата со наслов „Илјада години Бигорски манастир“. „Ансамбл Македонија“ во соработка со Бигорскиот манастир подготви изложба со дваесетина најдрагоцени икони по повод прославувањето на 1000 години постоење на манастирот.

На изложбата се прикажани осум олтарни икони, две чудотворни икони, две тронски икони (Владички и Игуменски трон), три икони од 16-иот век, еден капак од Кивот од Светите мошти, една плаштеница и две фрескоикони. Иконите се прикажани во нивната оригинална големина. Изложбата се состои од верни реплики на икони, фрески и плаштеница.

(Текстот е објавен во „Културен печат“ број 45, во печатеното издание на „Слободен печат“ на 22-23 август 2020)