Изложба на графичката работилница „Софија – Богданци“ ќе биде поставена во КИЦ-Скопје
Отворањето на петтата триенална изложба на графички листови од главната сесија на графичката работилница „Софија – Богданци“ ќе се одржи на 26 јануари, во 20 часот, во салоните „Империјал 1 и 2“ во Културно-информативен центар – Скопје.
Графичката работилница „Софија – Богданци“ е јадрото на едно продуктивно уметничко движење кое веќе 17-та тековна година ги обединува младите графичари од Македонија и од регионот. Настан кој навидум има само локално значење, но всушност е една успешна регионална приказна која претендира да го одржи приматот на графиката како специфичен и мошне моќен уметнички израз.
Главната сесија се одржува секоја година на крајот на август и почетокот на септември и на неа до сега имаат учествувано над 200 уметници од целиот регион. Улогата на ментори ја имаа истакнати графичари и универзитетски професори од Македонија, Србија, Хрватска и Босна и Херцеговина.
Целта на графичката работилница и, пред сè, на главната сесија е да го поттикне традиционалното создавање на графички израз. Учесниците имаат ретка можност да творат во сите традиционални техники (висок, длабок, рамен и пропустен печат) и да разменуваат искуства со графичари од други ликовни академии.
Изложбата во Културно-информативен центар – Скопје ќе биде отворена до 13 февруари оваа година.