Граѓаните на 13 развиени земји имаат поголема доверба во претседателите на Русија и на Кина Владимир Путин и Си Џинпинг отколку на американскиот претседател Доналд Трамп, покажуваат резултатите од анкетата спроведена од независниот истражувачки центар Пју (Pew Research Center) со седиште во Вашингтон.

Истражувањето е спроведено меѓу испитаници од Јапонија, од Австралија, од Канада, од Велика Британија, од Холандија, од Јужна Кореја, од Шпанија, од Италија, од Шведска, од Франција, од Данска, од Германија и од Белгија. Учесниците беа прашани за нивната доверба во лидерите на САД, на Германија, на Франција, на Велика Британија, на Русија и на Кина и нивниот пристап кон меѓународните прашања.

Според резултатите, жителите на 13. држави имаат најголема доверба во германската канцеларка Ангела Меркел (76 отсто од испитаниците), нешто помалку во францускиот претседател Емануел Макрон (64 отсто), а 48 проценти од анкетираните имаат доверба во британскиот премиер Борис Џонсон. Вкупно 23 отсто од испитаниците имаат доверба во Владимир Путин во неговиот пристап кон меѓународните односи, во Си Џинпинг – 19 отсто, и најмалку (16 отсто) во Доналд Трамп.

Мнозинството од анкетираните кои изразиле доверба во Путин се жители на Италија (37 отсто) и на Германија (31 отсто). Студијата е спроведена по телефон меѓу 13.273 возрасни лица од 13 развиени земји, во периодот од 10 јуни до 3 август.