Како што информираат италијанските медиуми, Интер ја следи ситуацијата со играчот од средниот ред на Бреша, Сандро Тонали. За 20-годишниот играч од средниот ред, кој го споредуваат како новиот „Андреа Пирло“, се поврзува и со трансфер во Јувентус, Милан, Манчестер јунајтед и Барселона.

„Неро-аѕурите“ денеска објавија дека и официјално се разделија со аргентинскиот интернационалец Мауро Икарди.

Според „Гаѕета дело Спорт“, Тонали е апсолутен приоритет на Антонио Конте и сега со парите од продажбата на Икарди, можно е наскоро да се реализира трансферот на „Џузепе Меаца“.

Бреша првично бараше 50 милиони евра за младиот фудбалер, но поради ситуацијата со Ковид-19, можно е цената на трансфер пазарот да падне на 40 милиони евра.

Оваа сезона досега Тонали реализираше еден гол и запиша пет асистенции во 23 натпревари во Серија А, а воедно има три мечеви за најдобрата италијанска репрезентација.