Седницата за инаугурацијата на првата жена претседател на државата Гордана Сиљановска-Давкова Собранието ќе ја закаже на 12 мај в недела, денот кога завршува мандатот на актуелниот шеф на државата Стево Пендаровски, потврдуваат за „Слободен печат“ собраниски извори.

Во моментов претседателот на Собранието, Јован Митрески е на координација со шефовите на пратеничките групи за утврдување на деталите за седницата за инаугурација на Сиљановска-Давкова.

Таа пред пратениците од сè уште актуелниот состав треба да има обраќање и да даде свечена изјава по која и започнува да тече нејзиниот петгодишен мандат.

Според последните податоци од Државната изборна комисија (ДИК), во вториот круг од претседателските избори Силјановска-Давкова освои 308.632 гласа повеќе од противкандидатот Стево Пендаровски. Од обработени 99,09 отсто од избирачките места и 99.82 отсто обработени избирачи, за неа гласале 560.173 граѓани, а Пендаровски доби 251.541 глас.

Само ден пред инаугурацијата Сиљановска-Давкова ќе наполни 71 година. Таа е родена на 11 мај 1953 година во Охрид. Таа е универзитетска професорка, правник, и пратеничка во претходните четири години.

Во нејзината биографија е наведено дека основно и средно образование завршила во Скопје (1973). Дипломирала на Правниот факултет во Скопје (1978), каде што и магистрирала. Докторирала пред комисија предводена од проф. Франц Град со „Cum laude“ на Правниот факултет во Љубљана, на тема „Local Selfgovernment – between Norms and Reality“ во 1994.
Била избрана за асистент по предметот политички систем на Правниот факултет во Скопје (1989), за доцент по уставно право и политички систем (1994), а потоа и за редовен професор во 2004. Била член на Уставната комисија на Собранието на РМ (1990-1992) и министер во Владата на РМ (1992-1994). Експерт за избори на ООН и потпретседател на групата Независни експерти за локална самоуправа при Советот на Европа. Член на Венецијанската комисија. Автор е на стотина научни трудови за уставното право и политичкиот систем.