На повеќе локации во општина Илинден засадени се повеќе од 600 различни видови садници со што е реализирана акцијата за пошумување во рамки на проектот „Зелена општина Илинден“. Целта на акцијата, како што што информираат од Илинден е унапредување на квалитетот на воздухот, заштита на животната средина и подобрување на условите за живот на граѓаните.

Акцијата беше спроведена со заеднички ангажман на општествено одговорни компании, граѓани, ученици, јавните претпријатија и општинската администрација. Пошумувањето се одвиваше долж пешачко-велосипедски патеки, улици и патишта, во близина на училишта, детска градинка, спортски терени, како и на подрачјето во н.м. Мршевци кое беше зафатено од пожарите во текот на летото, но и на други јавни површини – велат од Општината.

На настанот присуствуваше и градоначалникот Александар Георгиевски, кој нагласи дека грижата за животната средина е заедничка одговорност и дека преку вакви активности се придонесува за подигнување на еколошката свест, почист воздух и поздраво опкружување. Тој истакна дека ваквите еколошки иницијативи ќе продолжат и во иднина.

Според него, заштитата и унапредувањето на животната средина останува еден од клучните приоритети на локалната самоуправа, при што само во текот на 2025 година на територијата на општината се засадени околу 750 садници.