Во Специјализираните совети на Косово во Хаг денеска ќе продолжи судењето на поранешните водачи на ОВК Хашим Тачи, Јакуп Красниќи, Реџеп Селими и Кадри Весели, јавуваат Репортери.

На последната седница одржана на 20 јуни беше сослушан единаесеттиот сведок. Како и претходното, така и ова рочиште се одржа со мерки за заштита на идентитетот на сведоците. Во меѓувреме, судскиот совет изрази загриженост за брзината на рочиштето за тој судски случај и ги потсети странките дека е непотребно детално да се испрашуваат сведоците.

Обвинителството на 28 јуни достави список со уште 12 сведоци кои ќе бидат повикани во судскиот спор што се води во Хаг против поранешните лидери на ОВК.

Судењето на поранешните водачи на ОВК започна на 3 април, а Тачи, Весели, Селими и Красниќи, кои се обвинети за воени злосторства и злосторства против човештвото, се изјаснија дека не се виновни по ниту едно од обвиненијата.

Тие се во притвор во Хаг од ноември 2020 година.