Хачанов и Рибакина први полуфиналисти на „Австралија опен“
Карен Хачанов од Русија успеа да обезбеди пласман во полуфиналето на грен слем турнирот „Австралија опен“ во Мелбурн. Во четвртфиналето при водство на Хачанов од 7:6 (5), 6:3 и 3:0, Американецот Себастијан Корда во третиот сет го предаде мечот поради повреда.
За пласман во големото финале рускиот тенисер ќе игра против победникот од мечот Стефанос Циципас (Грција) – Јиржи Лехечка (Чешка).
Во останатите четвртфинални дуели закажани за в среда се среќаваат: Бен Шелтон (САД) – Томи Пол (САД) и Андреј Рубљов (Русија) – Новак Ѓоковиќ (Србија).
Кај жените Елена Рибакина од Казахстан со 2:0 во сетови 6:2 и 6:4 за еден час и 21 минута игра ја совлада Летонката Јелена Остапенко.
Во полуфиналето Рибакина ќе се соочи со победничката од дуелот Џесика Пегула (САД) – Викторија Азаренка (Белорусија). В среда ќе играат Каролина Плишкова (Чешка) – Магда Линет (Полска) и Арина Сабаленка (Белорусија) – Дона Векиќ (Хрватска).