Тренерот на Болоња вечерва рече во Белград дека наградата од Фудбалската федерација на Србија (ФСС) за најдобар тренер му е најголемо признание кое можел да го добие во кариерата.

Наградата му ја врача претседателот на ФСС, Славиша Кокеза, а пред да ја напушти бината, Миха кој е првпат во Србија откако ја започна борбата со леукемијата, беше испратен со голем аплауз.

– Ветив дека нема да плачам. Ви благодарам од срце. Голема благодарност до сите за оваа награда, бидејќи да се биде најдобар тренер на Србија и се биде избран од моите луѓе за мене нема поголема важност, тоа за мене е најголемото признание кое можев да го добијам во кариерата – рече Михајловиќ.

Воедно славниот фудбалер на Црвена звезда упати честитки до српската фудбалска федерација по повод 100 години постоење.

– Јас веќе живеам 30 години во Италија, но секогаш бев и ќе останам Србин. Се надевам дека никогаш не ве разочарав и дека секогаш со сите мои, и добри и лоши нешта, ја претставував Србија на најдобар можен начин и тоа ќе го правам и во иднина – додаде Михајловиќ.

Минатиот месец беше објавена една убава вест, кога му беше пресадена коскена срж.