Шампионот од Вимблдон, Новак Ѓоковиќ, очекувано нема да учествува на турнирот од мастерс серијата 1000 во Монтреал, Канада.

Организаторот потврди дека Ѓоковиќ нема да биде дел од Мастерсот бидејќи канадските власти не му дадоа виза за влез во земјата поради корона протоколите. Канадската влада исто како и американската, не дозволува влез во земјата на странци што не се вакцинирани против коронавирус.

Ѓоковиќ претходно годинава јавно изјави дека нема намера да се вакцинира против коронавирус дури и доколку таа одлука биде штетна за неговата кариера, односно не може да настапува на дел од турнирите како што сега е случај во Канада и најверојатно во САД. Мастерсот во Монтреал треба да се одржи од 7 до 14 август.

Доколку не дојде до големи промени во последен момент, Ѓоковиќ ќе ги пропушти и останатите два големи турнири во Северна Америка, Мастерсот во Синсинати и последниот годинешен гренд слем турнур, УС Опен.