Германската полиција ги предупредува граѓаните кои имаат намера да летуваат во Хрватска да внимаваат на кои локации резервираат станови, со оглед на пријавените случаи на измами, пишува Феникс Магазин.

Полицискиот оддел Швабен Суд ги предупредува германските туристи кои резервираат одмор во Хрватска да внимаваат на лажните веб-страници кои нудат сместување на јадранскиот брег. Како пример, тие ги наведуваат случаите на две семејства од Aлгау кои резервирале „одличен стан по разумна цена“, кој се покажал дека е измама. Едно од семејствата ги платило парите за станот преку лажна веб-страница која била направена да „изгледа како веб-страница на реномиран давател на услуги“.

Првиот контакт со „сопственик во Хрватска“ го оствариле преку оглас на интернет. Станот бил изнајмен „преку пораки и мејлови“. Од семејствата се барало веднаш да платат половина од киријата, па едно семејство платило значителна сума. За среќа, второто семејство навреме ја препознало лажната понуда и не ја платило однапред бараната кирија, пишува Феникс Магазин, пренесува Пословни хр.