Гастрономско уживање од Дијана Иваноска: Колачи со лаванда и лимон
Животот навистина може да биде беспрекорно вкусен, а тоа го потврдува и Дијана Иваноска од Тетово, која со својот талент за комбинација на вкусови нè носи на едно исклучително гастрономско патување.
Иваноска стои зад инстаграм-профилот „Dash of Spice“ и ни ги открива малите тајни за создавање магија од вкусови. Своите рецепти почнала да ги споделува со своите следбеници и пријатели од почетокот на пандемијата.
„Го сакам секој дел од процесот, но најмногу уживам во фотографирањето на храната“, ни открива Дијана.
Дијана денеска ни споделува вистинско гастрономско уживање – бисквитни колачи со лаванда и лимон.
„Путерни, цитрусни, цветни… прекрасна комбинација на мирис и вкус“, порачува Дијана.
Состојки:
– 270 г брашно
– 50 г шеќер
– 1 лажиче печиво
– 1 лажиче сода-бикарбона
– 1/2 лажиче сол
– 115 г путер (ладен и исечкан на ситни коцки)
– 2 лимони (кора и 4 лажици од сокот)
– 2 лажици мак
– 1 лажиче сушена лаванда
– 1 јајце
– 60 мл млеко
За прелив:
– 2, 3 лажици боровинки
– малку млеко (или сок од лимон)
– 100 г шеќер во прав
Подготовка:
Во еден подлабок сад измешајте ги брашното, шеќерот, печивото, сода-бикарбоната и солта. Ладниот путер истријте го во брашното додека добиете ронлива смеса. Во млекото измешајте го сокот од лимон. Во брашното додајте ја кората од лимон, лавандата и макот. Јас лавандата ја мелев во мелница за кафе, но ако сакате, може и да ги ставите цели сувите цветчиња. Во млекото со лимоновиот сок измешајте го и јајцето и додајте го на сувите состојки. Замесете тесто, но немојте долго да го месите само колку убаво да се спои. Префрлете го тестото на хартија за печење и оформете круг со дебелина 2-2,5 см. Исечете го дискот на 8 парчиња. Разделете ги малку додека се печат. Премачкајте со малку млеко и печете околу 18-20 минути или додека поруменат по краевите.
За преливот:
Стиснете ги боровинките низ цедалка. Додајте го сокот од боровинки во шеќерот во прав. Додајте малку млеко или сок од лимон додека преливот ја добие потребната густина. Овој чекор е сосема опционален, колачите се преубави и без прелив. Или можете да го направите преливот само со шеќерот и млеко или сок од лимон. Јас го ставив сокот од боровинки за да ја добијам бојата на лаванда. Уживајте во секое залаче со чаша ладно млеко или кафе.