Извршната власт ќе се доформира во наредните денови, откако партиите СДСМ, Беса и ДУИ од владината коалиција ќе се договорат за распределбата на замениците-министри во Владата и директорите на позначајните секретаријати и агенции. Собранието, пак, сè уште е заглавено и не функционира затоа што во коалицијата потешко оди договорот која партија со која собраниска комисија ќе раководи.

Премиерот Зоран Заев викендов изјави дека сè уште не размислувал за замениците-министри, а неговиот заменик Артан Груби најави дека СДСМ и ДУИ ќе ги ротираат функциите во Владата.

– Јас сè уште немам одлучено затоа што првата седмица е време кога треба да се направи примопредавање и да се навлезе во работата на Владата, како и важните итни одлуки за граѓаните да се донесат. Следната седмица прв пат ќе размислам за тоа – рече премиерот Заев за распределбата на замениците-министри.

Според Груби, пак, двете партии ќе направат размена, односно онаму каде СДСМ има министер, ДУИ ќе добие заменик и обратно.

– Сметам дека ќе има размена меѓу двете наши партии, со што преземаме поголема одговорност за да го искажеме нашиот капацитет и новите задачи – најави Груби.

Пет заменици-министри за ДУИ, два за Беса

Според шпекулациите, ДУИ ќе има заменици-министри во министерствата за внатрешни работи, транспорт и врски, правда, здравство и одбрана. Исто така, се очекува да добие директорски места во МЕПСО, Агенцијата за државни патишта, Агенцијата за електронски комуникации, „М-НАВ“ и во Агенцијата за лекови „Малмед“, како што најави лидерот Али Ахмети минатиот месец веднаш откако беше објавен договорот меѓу СДСМ и ДУИ за нова владина коалиција.

Беса, партнерот на СДСМ од предизборната колалиција „Можеме“, која доби едно министерско место во ресорот Земјоделие, очекува две позиции на заменици-министри. Лидерот Билал Касани викендов најави дека разговорите со Заев се во тек.

– Како Движење Беса ќе разговараме со другите партнери на коалицијата за поделба на одговорностите и на другите ешалони и следните недели ќе имаме конкретен одговор – рече Касами.

Според најавите, извесно е дека оваа партија ќе добие заменици во министерството за образование и во министерството култура, а веќе се познати и имињата, односно Арафат Шабани ќе ја заменува Мила Царовска во Образование, а Седат Сулејмани ќе биде заменик-министер за култура. Заменик претседателот на Беса Абдуш Демири се очекува да раководи со Фондот за пензиско осигурување, со Македонска пошта или со Агенцијата за ветеринарство и храна. „Беса“ го бара челното место и во Агенцијата за млади и спорт, како и во Пазарниот инспекторат, Техничкиот инспекторат или во Управата за хидрометеоролошки работи.

Касами викендов не сакаше попрецизно да каже за кои директорски места преговара Беса и во која собраниска комисија ќе добие претседател.

– Откако ќе бидат формализирани сите назначувања на вториот и третиот ешалон во извршната власт под мое раководство како претседател на партијата ќе одржиме еднодневна конференција за транспаретност и декриминализација и ќе се обврземе за транспаретен, инклузивен пристап и бескомпромисна војна со корупцијата и криминалот. Ќе докажеме дека функционерите на движењето Беса ќе бидат пример за владеење за граѓаните и со граѓаните – рече Касами.

Сите ја сакаат Комисијата за европски прашања

Преговорите за комисиите во  Собранието одат потешко од оние за докомплетирање на Владата. Од опозициската ВМРО-ДПМНЕ велат дека партиите од владината коалиција имаат проблем да се договорат меѓусебе кој со која комисија ќе раководи, а тие како партија ги доставиле своите предлози за членови во комисите. Се шпекулира дека најголем проблем е што сите партии од владината коалиција сакаат да раководат со Комисијата за европски прашања и ниедна не попушта.

Касами викендов рече дека разговорите за собраниските комисии се уште траат и дека нема проблем во владината коалиција.

– Не би сакал да кажам дека тоа е проблем, но сигурно дека секоја од партиите сака да придонесе во комисии во кои најмногу ќе придонесе за граѓаните. Пратеничките групи се уште разговараат за тоа кој ќе ги предводи комисиите – рече Касами.

Во Собранието треба да се формираат 21 комисија. Во 20 од нив мнозинство ќе има владејачката коалиција, а опозициската ВМРО-ДПМНЕ ќе раководи со Комисијата за надзор на следењето на комуникациите. Според бројот на пратенички места коалицијата „Можеме“ на СДСМ ќе раководи со осум комисии, ВМРО-ДПМНЕ исто така со осум, ДУИ со три, а коалицијата на Алијанса за Албанците и Алтернатива со 2 комисии.

Спикерот Талат Џафери чека парламентарните партии да се договорат за да свика седница.

– Претседателот Џафери ќе ја свика седницата за формирање на работните тела на Собраниеето во моментот кога политичките партии ќе достават предлог. До овој момент таков предлог не е доставен од ниедна партија. Штом истиот биде доставен претседателот ќе може да свика седница – посочија во петокот од кабинетот на Џафери.

Собранието не може да почне да работи и да носи одлуки без да се формираат комисиите. Јавноста е во очекување на брзото формирање на функционални институции, што беше и една од главните причини што изборите беа организрани среде епидемијата од коронавирусот. Собранието треба да ги потврди одлуките за вонредна состојба на претседателот Стево Пендаровски и уредбите со законска сила што ги носеше техничката влада, и итно да да донесе законски измени со кои ќе се уреди новата учебна година што треба да почне од први октомври.