ФОТОГАЛЕРИЈА | Македонија избира претседател!
Македонските граѓани денеска гласаат на седмите претседателски избори, а во трка се седум кандидати. Граѓаните имаат можност својот глас да го дадат на еден од кандидатите. Процесот на гласање е главно регуларен и се одвива без проблеми, со ретки исклучоци.
Изборниот ден и изборните активности течат во мирна и демократска атмосфера. Имаше гласачи кои традиционално своето право на глас го остварија уште во утринските часови.
Вкупно 942 набљудувачи, странски новинари и преведувачи се акредитирани за следење на Претседателските избори. Како што е објавено на веб страницата на ДИК, заклучно до 19 април се акредитирани 342 домашни и 568 странски набљудувачи и преведувачи, од кои најбројни се од ОБСЕ/ОДИХР – 375.
По посета на две избирачки места претпладнево, претставничката на меѓународната мисијата за набљудување на изборите ОДИХР оцени дека почетокот е добар, но целосна проценка за тоа како се одвива изборниот процес ќе имаат откако на крајот на денот ќе ги соберат податоците од гласачките места низ целата држава.
На изборите за претседател на државата што се одржуваат денес право на глас имаат вкупно 1.814.317 избирачи.
„Слободен печат“ посети некои од избирачките места и атмосферата ви ја пренесуваме во продолжение преку фотографиите на нашите фото-репортери Слободан Ѓуриќ и Драган Митрески.