Непознати вандали денеска го оштетиле Споменикот на победата во строгиот центар на Тетово, на кој е сронет дел од малтерот на основата.

Неофицијално, според очевидци, споменикот го оштетиле деца, удирајќи со камења.

Во минатото, овој споменик многупати беше вандализиран, а последен пат тоа се случи лани во октомври, за време на предизборната кампања, кога активисти на Беса го искчртаа и го излепија со плакати со ликот на нивниот лидер Биљал Касами, кој потоа стана и градоначалник.

Последното сквернавење го осуди Општинската организација на Сојузот на борците од градот.

„Општинската организација на Сојузот на Борци најостро го осудува овој вандалски и нецивилизациски однос на поединци и групи кои го оштетиле споменикот на револуцијата, а кој ја симболизира антифашистичката борба на македонскиот народ и од другите националности кои несебично се жртвуваа за национална слобода. Бараме сторителите да бидат откриени и кривично да одговараат за стореното“, реагираа од организацијата.

Споменикот на победата, кој денес е познат и под името Споменик на револуцијата, е посветен на триумфот на антифашистичките сили во Народноослободителната војна. Тој е изграден во 1962 година и е дело на првата тетовска вајарка Борка Аврамова, која според хроничарот на Тетово Дарко Гавровски е автор на првата самостојна изложба на скулптури во Македонија (Скопје, 1954), што воедно била и првата самостојна изложба на жена-уметник кај нас.