Премиерот Христијан Мицкоски денеска во хотелот „Дабл три“ во Скопје организираше „велигденски ручек“ на кој ги повика политичките и верските лидери, соработниците и новинарите.

Настанот, на кој се служеле посни јадења, според фотографиите објавени на социјалните мрежи, бил доста посетен.

„Денес, во духот на големиот христијански празник Велигден, организирав свечен Велигденски ручек, исполнет со топлина, заедништво и почит кон традицијата. Овој значаен настан ги обедини претставниците на институциите и општествениот живот во едно заедничко славење на вредностите што Велигден ги носи – надежта, љубовта, простувањето и новиот почеток. Во атмосфера на меѓусебно разбирање и почит, се испрати силна порака за единство, солидарност и заедничка грижа за доброто на сите. Велигден нè потсетува дека токму преку сплотеноста и човечноста можеме да ги надминеме сите предизвици и да изградиме подобра иднина за нашата држава. Со оваа свеченост, уште еднаш се потврди определбата за негување на традицијата и зајакнување на заедничките вредности што нè поврзуваат како народ“, напиша премиерот на „Фејсбук“.

На „велигденскиот ручек“ присуствуваа и претседателката Гордана Силјановска Давкова, претставници на дипломатскиот кор, како и претседателот на Собранието, Африм Гаши.