Фонтаната „Воин на коњ“ преполна со ѓубре и тиња: Што чистеа „Водовод и канализација“?
Пластични шишиња, опаковки од храна, од цигари и разни други отпадоци пловат по водата во фонтаната „Воин на коњ“ на градскиот плоштад. Вистинска слика за тоа колку некои граѓани се со ниска еколошка свест и колку не се грижат за тоа што е општо добро.
Но, освен „пловечкото“ ѓубре, водата наместо сина е зелена од тињата на дното на фонтаната. За тоа срамот не е на сметка на граѓаните туку на оние што се надлежни за нејзиното одржување, поточно на ЈП „Водовод и канализација“.
Како што е познато оваа фонтана, како и фонтаните на плоштадот „Карпошово востание“ подолго време не работеа. Сега работат половично, може да се каже дека водата од нив повеќе се цеди отколку што прска. На прашањето до „Водовод и канализација“ зошто не се пуштаат фонтаните и дали претпријатието среде лето штеди вода, оттаму одговорија дека причината е тоа дека фонтаните мора да се исчистат.
Фонтаните „Воин на коњ“, „ВМРО“ и „Филип“ се исклучени во моментов, поради сезонско дополнително чистење, како резултат на дождовите проследени со ветар кои беа честа појава во изминатиот период и ќе бидат пуштени во употреба по завршувањето на оваа постапка и на другите подготвителни активности – кусо одговорија пред две недели од „Водовод и канализација“.
Потоа, после неколку дена фонтаните проработија, но ѓубрето остана. Што и како чистеле екипите на „Водовод и канализација“ или само чистењето беше изговор за нефункционирањето на фонтаните, тоа си го знаат само во претпријатието.
Граѓаните го „знаат“ она што секојдневно го гледаат – неисчистени фонтани, преполни со ѓубре.