Филозофскиот факултет во Љубљана објави избор со песни кои ги откриваат врските помеѓу човекот и животните
Филозофскиот факултет при Универзитетот во Љубљана ја објави книгата „Човекот за животните и животните за човекот во современата словенска поезија“, каде што како уредник на изданието се појавува познатата професорка и преведувачка Намита Субиото.
Книгата содржи разновиден избор на текстови од современата бугарска, чешка, хрватска, македонска, полска, словачка, српска и украинска поезија, кои го тематизираат односот меѓу човекот и животното.
Изборот е објавен на оригиналниот јазик на кој е напишана песната проследена со препев на словенечки јазик. Преводите се обезбедени од етаблирани преведувачи, предавачи и студенти од студиските програми на Катедрата за славистика на Филозофскиот факултет при Универзитетот во Љубљана, а под менторство на повеќе предавачи.
Наизменично со песните, како илустрации во книгата се поместени восхитувачки креации на учениците на Љубљанската школа за дизајн и фотографија, кои преведуваат избрани песни на визуелен јазик под водство на своите учители.
Книгата прво била објавена како електронско издание, но токму ликовниот момент бил пресуден истата да добие и печатено издание. Од македонските автори во книгата се застапени поетесата Лилјана Дирјан и поетот Игор Исаковски.
(Текстот е објавен во „Културен печат“ број 187, во печатеното издание на весникот „Слободен печат“ на 15-16.7.2023)