Еврејската заедница реагира: Со промоција и величење на фашизмот и нацизмот не се зајакнуваат добрососедските односи

Марка и плико со ликот на Цар Борис трети

Еврејската заедница и Фондот на холокаустот на Евреите од Македонија се згрозени и навредени од регистрaцијата на Здружението Цар Борис III Охрид и од леснотијата со која во Македонија се глорифицираат нацизмот, фашизмот и се шири говор на омраза.

-Очигледно е дека зачестија регистрации на здруженија со бугарска самосвест кои носат називи на докажани соработници на нацистичка Германија. Тоа е свесна провокација и навреда за Еврејската заедница, навреда за македонската држaва и за нејзините граѓани… или некој можеби мисли поинаку, дека на овој начин, со промоција и величење на фашизмот и нацизмот, се зајакнуваат добрососедските односи?! Името цар Борис III е поврзано со прогонот и уништувањето на Евреите од окупираните територии од страна на фашистичка Бугарија за време на Втората светска војна. Да потсетиме, цар Борис III и владата на Царска Бугарија се директни виновници за депортацијата на повеќе од 11.300 Евреи од окупираните територии во Македонија, Грција и Србија, од кои 7.144 се Евреи од Македонија, во центарот за убивање Треблинка, во окупирана Полска. Цар Борис III на 21 јануари 1941 година го потпишува антиеврејскиот Закон за заштита на нацијата, ја презема паролата на нацистичка Германија „Eден цар, еден народ, една држава” и е докажан заговорник за спроведување на таканараченото „Конечно решение на еврејското прашање”. Ова е еклатантен пример на негирање и искривоколчување на холокаустот, на исмевање и навреда за Евреите, реагираат од Еврејската заедница и Фондот на холокаустот на Евреите од Македонија.

Од таму нагласуваат дека на 18.04.2022 година во реакцијата за отворањето на културниот клуб „Ванчо Михајлов” во Битола повикале на тоа „да се поведе постапка околу правната издржаност културни и други центри, граѓански здруженија и сл. да носат имиња на потврдени фашисти и докажани соработници на нацистите”.

-Што треба да очекуваме да се случи следно? Регистрација на здруженија што го носат името на Александар Белев – комесар за еврејски прашања, Петар Габровски – министер за внатрешни работи и јавно здравје, Богдан Филов – премиер на Царска Бугарија, или можеби на Адолф Хитлер? Несфатлива е рамнодушноста на надлежните органи во прилики кога одредени поединци на најгруб начин ја искривуваат историјата и газат по достоинството на Евреите и на сите граѓани на Северна Македонија. Кои се тие лојални граѓани на Северна Македонија кои сеат омраза и глорифицираат антисемити, фашисти и нацисти основајќи вакви и слични „културни здруженија”?, отворено прашуваат од Еврејската заедница.

Тие бараат одговори од владата до каде е спроведувањето на двете заложби на државата преземени во Малме на Меѓународниот форум за сеќавање на холокаустот и борбата против антисемитизмот „Remember – React”, 12-14.10.2021 год., а поврзани со Заклучоците на Владата на Р Северна Македонија од 14 септември 2021 година: 1. проширување на наставната програма за борба против антисемитизмот и негирање на холокаустот за учениците од 8. и 9. одделение; 2. задолжителна посета на Меморијалниот центар на холокаустот за учениците од основното и од средното образование?

-Тоа е вистинскиот пат и начин како да се сузбие говорот на омраза и да се оневозможи искривување на историјата. Нашата држава може и мора да застане на патот на сè позачестените појави на регистрирање вакви здруженија, кои со своите провокации и навреди шират говор на омраза и остануваат неказнети под превезот на слобода на говорот или добрососедство. Тоа е класичен пример за искривување на историските факти и величење на фашизмот и нацизмот. Чин што не е во духот на мултикултурализмот во нашата држава и не е во духот на добрососедските односи меѓу Северна Македонија и Бугарија, нагласуваат од Еврејската заедница и Фондот на холокаустот на Евреите од Македонија.

Од Еврејската заедница и Фондот на холокаустот на Евреите од Македонија не одговорија дали објектот во кој е сместен Културниот клуб Иван Михајлов во Битола некогаш припаѓал на еврејско семејство кое е депортирано, како што се тврдеше во репортажа објавена на германската телевизија ЗДФ.

-Немаме информација дали таа куќа навистина припаѓала на некое еврејско семејство, но уште денеска се потрудивме да разбереме. Куќата сега е во приватна сопственост и како таква припаѓа на клубот и не припаѓа на еврејско семејство. Меѓутоа дали припаѓала, тоа не го знаеме но ќе провериме преку Катастарот во Битола. Обично таа процедура трае 7 до 10 дена и ние ја започнавме процедурата за движење на недвижноста, изјави вчера Пепо Леви, претседател на Еврејска заедница во РМ за Канал 5.

 

 

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот