Американската рап ѕвезда Еминем побара од републиканскиот претседателски кандидат Вивек Рамасвами да престане да ги користи неговите песни. Писмото доаѓа повеќе од една недела откако биотехнолошкиот претприемач испорача импровизирана изведба на „Луз јорселф“ на Државниот саем во Ајова.

Еминем го поднесе барањето преку организацијата за вршење права БМИ во писмо на 23 август. Рамасвами се бори да го собори Доналд Трамп како претпоставен републикански кандидат за 2024 година, пишува Би-Би-Си.

Портпаролката на Рамасвами рече дека тој ќе го исполни барањето на Еминем, чие вистинско име е Маршал Метерс Трети. Во писмото се вели дека компанијата „добила порака од“ Еминем кој се спротивставува на употребата на неговите „музички композиции“ од страна на републиканскиот кандидат.

Повикувајќи се на текстот на Еминем, портпаролката на кампањата, Триша Меклафлин, во изјава за американските медиуми рече: „Вивек само се качи на сцената и се ослободи“.

„На жалост на американскиот народ, рапувањето ќе мора да го оставиме во сенка“ додаде таа.

Во одговорот на ситуацијата, Рамасвами праша дали „вистинскиот Слим Шејди може да стане“, повикувајќи се на еден од најголемите хитови на американскиот рапер.