Парламентот на Ел Салвадор, во кој доминира партијата „Нови идеи“ на претседателот Наџиб Букеле, во четвртокот со огромно мнозинство го одобри предлогот за ревизија на уставот со цел отстранување на какво било ограничување за бројот на мандати што шефот на државата може да ги извршува, со што ќе му се овозможи реизбор неограничен број пати.

Реформата, која беше испитана преку брза постапка и исто така предвидува продолжување на претседателскиот мандат од четири на шест години, беше одобрена со 57 гласа „за“ и 3 „против“.

44-годишниот Букеле е на власт од 2019 година, а беше реизбран за претседател на Ел Салвадор во февруари 2024 година, обезбедувајќи над 80% од гласовите – и покрај експлицитната забрана на претходниот устав за директен реизбор за втор последователен мандат на функцијата.

Тој продолжува да ужива особено голема популарност благодарение на „војната против бандите“ што ја објави во 2022 година, и покрај критиките од групите за човекови права за неговите методи.