Две диви копачки фатени со стари монети, детектори за метал и алат кај Свети Николе
Две жени, едната од Скопје, а другата од Штип, се уапсени вчера откако биле запрени на автопатот Скопје-Штип кај Свети Николе, а полицијата во нивниот автомобил нашла предмети за кои се сомнева дека претставуваат културно наследство, како и копачи и детектори за метал, соопшти МВР.
„Полициски службеници од Мобилната единица за компензаторни мерки при Одделот за гранични работи и миграции ги лишиле од слобода 52-годишната Н.Л.С. од Скопје и М.Н.(41) од Штип. На автопатот Скопје – Штип, кај клучка Југ-Свети Николе, при преглед на патничко возило „пежо” со скопски регистарски ознаки, управувано од Н.Л.С, во кое сопатник бил М.Н., биле пронајдени и одземени повеќе парчиња стари монети и други предмети за кои постои сомнение дека се предмети од културно наследство, како и два детектора за злато и неколку копачи“, се вели во полицискиот билтен.
Двете жени биле биле задржани во полициска станица и во службен разговор изјавиле дека ископот го вршеле на локација кај с.Стањевце, светиниколско. По целосно документирање на случајот против нив ќе биде поднесена соодветна пријава, додаваат од МВР.