Изборот на град-домаќин на 67. издание на Избор на песна за Евровизија, кое ќе се одржи следната година во Велика Британија, влегува во завршна фаза, соопшти Би-би-си.

Откако потесниот избор на град-домаќин беше намален од седум на два, Глазгов и Ливерпул остануваат во „трката“. За жал, Бирмингем, Лидс, Манчестер, Њукасл и Шефилд ја пропуштија шансата да го организираат музичкото натпреварување следната година.

Претседателот на комисијата, Фил Харолд им се заблагодари на градовите-кандидати што покажале голема желба за организирање на настанот.

„Бевме неверојатно импресионирани од квалитетот и креативноста на сите понуди“, рече Харолд.

Тој додаде дека Изборот на песна за Евровизија е многу тежок настан за организација, а Ливерпул и Глазгов имаат најквалитетна понуда според сите критеруми.

Конечната одлука ќе биде донесена „во рок од неколку недели“, соопшти Би-би-си.

Велика Британија беше избрана за домаќин на ова музичко натпреварување бидејќи годинашниот победник, Украина не е во можност да го организира настанот поради тековната војна. Британскиот пејач Сем Рајдер го освои второто место.