Организаторот најави дека ќе биде дозволен ограничен број на навивачи на трибините, а карантинот за тенисерите нема да биде ригорозен иако тие ќе бидат сместени во „меур“.

Најголемата промена во однос на последното издание на Мастерсот во Мајами е драстично намалениот награден фонд.
Победниците на овогодинешното издание ќе заработат по 300.110 долари, што е за дури еден милион долари помалку од 2019 година. На последниот Мастерс во Мајами кој се играше  во 2019 година, победниците во машка и женска конкуренција, Рожер Федерер и Каролина Плишкова, заработија по 1.35 милиони долари.
Драстично намален е и вкупниот награден фонд кој за оваа година ќе изнесува само 3.34 милиони долари. Колку за споредба, на турнирот кој се играше 2019. година, наградниот фонд изнесуваше 16.7 милиони долари.

Олеснителна околност за тенисерите и тенисерките е тоа што нема да одат на задолжителен карантин како што беше случај со Австралија пред одигрување на грен слем турнирот. Сите играчи и членови на нивните тимови, пред да добијат дозвола да летаат кон САД ќе мора да достават негативен тест на коронавирус, а по доаѓањето во Мајами повторно ќе бидат тестирани. Вториот тест ќе биде по четири дена од нивното пристигнување во САД, а иако нема да има карантин, од играчите ќе се бара да се движат само од хотелот до тениските терени и доколку некој го прекрши ова правило може да биде парично казнет или дисквалификуван.