Полскиот тенисер Хуберт Хуркач е победник на Мастерсот во Шангај, Кина, откако во финалето го совлада Русинот Андреј Рубљов со 6:3, 3:6 и 7:6 (8) после два часа и шест минути игра.

Ова е втора титула за Хуркач сезонава, првата ја освои во Марсеј, а вкупно седма во неговата кариера.

Хуркач подобро го отвори мечот, во шестиот гем направи брејк и поведе со 4:2. Во деветтиот гем ја искористи втората сет топка за 6:3 и водство во сетови.

Рубљов беше подобар во вториот сет, направи брејк уште на стартот и стигна до 3:0. После тоа, само ја задржуваше предноста до конечните 6:3 за израмнување во сетови.

Во решавачкиот сет Рубљов прокоцка брејк топка во третиот гем, а Хуркач пропушти меч топка при 5:4, на сервис на Русинот.

Во тај-брејкот рускиот тенисер поведе со 3:0. Недолго потоа беше и 5:2 за Рубљов, позитива која ја испушти. Полјакот се врати со серија од 3:0, па следуваше игра поен за поен до резултат 8:8. Хуркач направи уште еден мини брејк за 8:7, а потоа сервираше за победа.