Купишта градежен и друг отпад, расфрлани делови од механизација, амбалажа, буриња од кои во почвата се излева нафта или мазут го „красат“ градилиштето на т.н. Сончев град. Планинари што деновиве го посетија тој дел од планината Водно споделија впечатоци за „Слободен печат“.

– Станува збор за неколку локации на просторот на кој треба да никне населбата „Сончев град“ на источните падини на Водно. Надлежните се подзаборавиле, па инвеститорот или изведувачот на градежните работи постапува како што сака – вели еден од планинарите што речиси секојдневно се движат по патеки кон врвот на Водно.

Тој додава дека и самиот неколкупати имал непријатни средби со обезбедувањето на градилиштето, иако пределот не е ограден и нема видливо поставени табли за тоа кој изведува градежни активности, односно кој е одговорен за тоа што се случува.

Од Државниот инспекторат за градежништво и урбанизам за „Слободен печат“ во врска со овој случај ни одговорија дека во скоро време немале инспекциски надзор на градилиштето и побараа информации за конкретните локации пред да можат да дадат прецизен одговор.

Од „Џевахир скај сити“, инвеститор на проектот „Сончев град“, не беа достапни да одговорат на нашите прашања во врска со градилиштето на Водно, со образложение дека се презафатени.

Парк-шумата Водно со одлука на Владата во мај годинава беше прогласена за заштитено подрачје, заштитен предел. Надлежноста на заштита на Водно е на Град Скопје, кој е обврзан да донесе план за управување со заштитениот предел и да воспостави чуварска служба.