Зохран Мамдани, демократски социјалист, победи на изборите за градоначалник на Њујорк, и стана првиот муслиман од јужноазиско потекло што го предводи најголемиот град во Америка. „Њујорк ќе биде светлина во овој момент на политичка темнина“, рече 34-годишниот Мамдани во својот победнички говор во Бруклин.

Дeмократот Зохран Мамдани, кој се опиша себеси како „најлошиот кошмар на Трамп“, е најмладиот човек во последните 100 години кој е избран да раководи со Њујорк. Според Изборниот одбор на градот Њујорк, на овогодинешните избори гласале повеќе од два милиони луѓе. Пред четири години, излегле помалку од 1,15 милиони гласачи.

„Ќе се бориме за вас, затоа што ние сме вие“

Излегувајќи на сцената во Бруклин по 23:45 часот по локално време, Мамдани рече: Сонцето можеби зајде вечерва над нашиот град, но како што еднаш рече Јуџин Дебс, ја гледам зората како подобар ден за човештвото.

„Вечерва, и покрај сите очекувања, сфативме. Иднината е во наши раце. Мои пријатели, соборивме политичка династија. Му посакувам на Ендру Куомо само најдобро во неговиот личен живот, но нека вечерва биде последен пат кога ќе го изговорам неговото име додека ја вртиме страницата на политиката што ги напушта многумина и им служи на малкумина“, додаде тој.

Тој им се заблагодари на „следната генерација њујорчани“, додавајќи: Ќе се бориме за вас, затоа што ние сме вие. Победивме затоа што њујорчаните си дозволија да се надеваат дека невозможното може да се постигне, додаде тој.

„Ако некој може да ѝ покаже на нацијата како Доналд Трамп може да се победи, тоа е градот каде што е роден. Ова не е само начинот на кој го запираме Трамп. Ова е начинот на кој го запираме следниот Доналд Трамп, бидејќи знам дека ме гледате, имам два збора за вас: Зголемете ја јачината на звукот“, рече Мамдани, додека толпата испушташе најгласени извици на поддршка и ентузијазам досега.

Кој е Зохран Мамдани?

За само неколку кратки години, Зохран Мамдани од организатор на нацијата стана политичка ѕвезда на американската левица. Неговата победа не е само личен триумф, таа сигнализира растечки бран на прогресивна политика во рамките на Демократската партија и растечка недоверба кон политичкиот естаблишмент кај младите гласачи, наведува „Тајмс оф Индија“.

BREAKING: Zohran Mamdani wins New York City mayoral election pic.twitter.com/2MhLywJcEv

— The Spectator Index (@spectatorindex) November 5, 2025

Роден е во Уганда во 1990 година и израснат во Њујорк, каде што се преселил со своето семејство кога имал седум години. Неговата мајка е познатата индиска режисерка Мира Наир, а неговиот татко е угандански активист и академик. Неговото име е Зохран Кваме и комбинира референци на персиско, африканско и индиско културно наследство.

Мамдани често го истакнува своето имигрантско потекло како основа за политичка емпатија.

„Пораснав во систем каде што многу рано научив што значи да се биде сиромашен, невидлив и погрешно разбран“, рече тој во едно интервју.

Се школувал на престижни американски универзитети, но наместо финансиска кариера или академска сигурност, тој избрал организирање на заедницата во Квинс, општината што сега ја претставува во Градското собрание на Њујорк.

Политичка кариера

Првпат стана политички активен како организатор на движењето за права на домување. Заедно со други активисти од Демократските социјалисти на Америка (ДСА), Мамдани изгради поддршка на терен за идејата дека политиката треба да им служи на интересите на работниците и сиромашните, а не на корпорациите и елитите. Во 2020 година, тој беше избран во Собранието на државата Њујорк како кандидат на ДСА, победувајќи го кандидатот на естаблишментот.

Неговата кампања се водеше со мал буџет, но волонтираше многу. Мамдани користеше повеќе јазици, вклучувајќи урду и шпански за да допре до разновидната заедница во Асторија, Квинс.

Демократски социјалист и критичар на Израел

Мамдани отворено се нарекува себеси „демократски социјалист“. Неговата политичка платформа се базира на борба против сиромаштијата, расната и класната нееднаквост и климатската криза. Тој се залага за бесплатен јавен превоз (укинување на автобуските билети), универзална грижа за деца, замрзнување на киријата за субвенционирано домување, попристапни цени во продавниците и прогресивно оданочување на најбогатите.

Неговиот став за надворешна политика, исто така, се разликува од мејнстрим Демократската партија. Тој отворено ги поддржува Палестинците и ги критикува израелските политики, што често го доведува во конфликт со произраелското лоби во партијата.

Неговиот став за Израел и Палестина предизвикува реакција од американските еврејски лидери, кои рекоа дека Мамдани не треба да го води градот со најголемо еврејско население надвор од Израел ако не може јасно да ги отфрли таквите термини.

Неговата победа е порака до демократскиот естаблишмент

Како и неговата политичка сојузничка Александра Окасио-Кортез, Мамдани успешно ги користеше социјалните медиуми за да допре до помладите гласачи и директно да одговори на критиките. Неговите видеа на кои разговара со гласачите на Трамп и се обидува да ги разбере нивните причини, станаа вирални.

Во кампањата, тој користи едноставен, разговорен јазик. Не носи вратоврска. Снима видеа со боливудски референци, зборува урду и шпански, често шета со мегафон и ранец. Сето ова е дел од автентичната слика на политичар кој не сака да дејствува „одозгора“, туку „рамо до рамо“ со граѓаните.

Неговото присуство во јавниот простор не е само политичка, туку и културна порака за инклузивност, антирасизам и редефинирање на американскиот идентитет.

Со победата над Ендру Куомо, Мамдани се пресели од локалната политика во арената од национално значење. Иако сè уште предизвикува скептицизам кај дел од демократскиот естаблишмент, поддршката што ја има од исклучително популарните демократски социјалисти Александра Окасио-Кортез и Берни Сандерс и младите гласачи може да сугерира дека попрогресивните политики на демократите се поефикасни во борбата против трампизмот и десничарскиот популизам што ја зафати Америка отколку умерената и либерална струја што ја води партијата, анализира Гардијан.

Во сублимиран заклучок на повеќето светски медиуми, победата на Зохран Мамдани не е само една изборна „ноќ“, таа е сигнал дека политичката матрица во метрополите може да се менува, дека традиционалните структури и политички фигури, вклучувајќи го и Трамп се поизложени на предизвиците на новите гласачи и новите политики. За Њујорк, за Демократската партија и за националната арена, ова е нова страница.