Денеска e Божиќ – еден од најзначајните денови во православното христијанство, кога се одбележува раѓањето на Исус Христос.

Во православната традиција, Божиќ го симболизира почетокот на нов живот и нова надеж. Низ цела Македонија и поширокот во храмовите на Македонската православна црква – Охридска архиепископија се служи божиќната литургија.

На 7 јануари големиот празник се одбележува во црквите што го следат Јулијанскиот календар. Освен во Македонија, Божиќ денеска се слави и во Србија, Русија, Црна Гора, делови од Украина, Грузија, како и во православните заедници под јурисдикција на Ерусалимската патријаршија и на Света Гора.

Се проценува дека десетици милиони православни христијани ширум светот христовото раѓање го слават денеска.

Независно од календарските разлики, Божиќ останува празник кој, за многумина, ја надминува строго религиозната димензија и се доживува како ден посветен на мирот, семејството и човечката солидарност — вредности од универзално значење.

Честит Божиќ!