Британскиот милионер, бизнисмен и поранешен почесен конзул Колин Армстронг и неговата девојка Колумбијката Кетрин Паола Сантос се киднапирани од луксузна куќа во Еквадор. Банда упаднала во нивниот дом и ги киднапирала, а парот исчезнал без трага, пишува „Гардијан“.

Неговиот син, Ник Армстронг, отишол во Еквадор за да ѝ помогне на полицијата во потрагата по неговиот татко, а неговата ќерка Дијана Армстронг – Брунс изјавила: „Ова е критично време. Само сакаме татко ни да се врати“.

78-годишниот бизнисмен бил киднапиран од 15 лица кои наводно биле маскирани во полицајци. Киднапирањето се случило некаде околу 2:45 часот по локално време на неговиот ранч Ранчо Родео Гранде во провинцијата Лос Риос. Киднаперите ги однеле со црн автомобил БМВ кој подоцна бил пронајден напуштен покрај патот, а подоцна била пријавена закана со бомба, наводно поврзана со киднапирањето.

Еквадорската полиција соопшти во твит на Икс: „По очигледно кривично дело против бизнисмен во раните утрински часови во Лос Риос, специјалистички полициски единици вршат оперативна и истражна работа на терен.“

INFORMAMOS ||

Ante presunto hecho delictivo en contra de un empresario ocurrido esta madrugada en #LosRíos; unidades especializadas de @PoliciaEcuador ejecutan labores operativas y de investigación en territorio.

Noticia en desarrollo… pic.twitter.com/PVbnSJ1QmQ

— Policía Ecuador (@PoliciaEcuador) December 16, 2023

На видеото објавено на социјалните мрежи, наводно од куќата во која бил киднапиран Армстронг, се гледаат чаршафи обоени со крв на креветот и ограбени соби.

Инаку, Армстронг бил шеф на британското конзуларно претставништво во еквадорскиот пристанишен град Гвајакил, а за неговите услуги во Велика Британија добил одликување од покојната кралица Елизабета.

Киднапирањата за откуп стануваат сè почести во Еквадор бидејќи зголемениот криминал – во голема мера поттикнат од бандите за шверц на дрога – ја трансформираше земјата од меѓу најбезбедните во Латинска Америка во најопасните за само пет години.