Борисов: Замислете јас да пратам шпион кај Путин, протерувањето би било најлесното нешто што ќе му се случи
Мојата земја никогаш не била заложник на притисоците кога станува збор за протерувањето руски дипломати, рече бугарскиот премиер Бојко Борисов по повод информациите дека бугарските власти протерале руски дипломат под сомнение за шпионажа..
-Претседателот Путин ме познава многу добро, тој знае и дека јас не сум подложен на притисоци. Кога на сите им наредуваа да протеруваат дипломати, јас не го сторив тоа. Сепак, ние сега фативме еден дипломат вклучен во шпионажа и одлучив веднаш да го решам прашањето. Замислете јас да испратам некој свој човек што би регрутирал луѓе во администрацијата на Путин, протерувањето би било најлесното нешто што би му се случило- додаде Борисов.
Руската амбасада во Бугарија добила нота од бугарското Министерство за надворешни работи во која вработен во амбасадата се прогласува за непожелно лице, а дипломатот ќе ја напушти земјата во рокот назначен во нотата, соопштија од амбасадата.