Американскиот државен секретар Антони Блинкен во саботата изјави дека американските претставници биле во директен контакт со сириската бунтовничка група која го предводеше бунтот за соборување на владата на претседателот Башар ал Асад, но се смета за терористичка организација од страна на Соединетите држави и другите земји.

Блинкен е првиот американски официјален претставник кој јавно ги потврди контактите меѓу администрацијата на претседателот Бајден и групата Хајат Тахрир ал-Шам, или ХТС, која ја предводеше коалицијата на вооружените опозициски групи што го соборија Асад минатата недела.

Говорејќи на прес-конференција во Акаба, Јордан, секретарот Блинкен рече дека нема да разговара за деталите од комуникацијата, но рече дека е важно САД да и пренесат пораки на групата за нејзините позиции и планови за управување во периодот на транзиција.

„Да, бевме во контакт со ХТС и други партии“, рече Блинкен. Тој додаде дека „нашата порака до сирискиот народ е оваа: сакаме тој да успее и подготвени сме да им помогнеме да го сторат тоа“.

ХТС, која некогаш беше огранок на Ал Каеда, беше прогласена за странска терористичка организација од Стејт департментот во 2018 година.

Оваа ознака носи со себе строги санкции, вклучително и забрана за каква било „материјална поддршка“ за групата или нејзините членови. Сепак, санкциите законски не им забрануваат на американските службеници да комуницираат со назначените групи.

Во интервјуто во саботата на сириската телевизија, водачот на групата, Ахмад ал Шарах, порано познат како Абу Мохамед ал Голани, не зборуваше за директни контакти со САД, но рече дека новите власти во главниот град Дамаск се во контакт со Западните амбасади.

ХТС презеде чекори за воспоставување безбедност и политичка транзиција откако ја презеде контролата врз Дамаск и се обидуваше да ја увери јавноста која по падот на Асад остана загрижена за екстремистичките џихадисти меѓу бунтовниците.

Водачите на бунтовниците велат дека групата раскинала со своето екстремистичко минато. Ал Шарах во петокот се појави во видео порака во која му честиташе на „големиот сириски народ за победата на благословената револуција“.

Американските власти велат дека ги поздравуваат коментарите на Ал Шарах за заштита на правата на малцинствата и жените, но и понатаму се скептични дека тој ќе ги почитува на долг рок.

Во петокот, сириските бунтовници и опозицијата соработуваа за безбедно да им го предадат на американските официјални претставници Американецот кој беше затворен од Асад.

Американските власти ја продолжуваат потрагата по Остин Тајс, американски новинар кој исчезна пред 12 години во близина на Дамаск.

„Им нагласивме на сите со кои бевме во контакт колку ни е важно да го најдеме Остин Тајс и да го вратиме дома“, рече Блинкен.