Високите температури што во летниот период знаат да достигнат и над 40 Целзиусови степени претставуваат сериозна закана за здравјето на населението, а на ризик од добивање на топлотен удар најмногу се изложени луѓето што немаат свој сопствен дом и се принудени жешките летни денови да ги поминуваат под отворено небо.

За жал, бројката на бездомни лица во Скопје е во постојан пораст. Според неофицијални податоци, во моментов изнесува приближно 500 граѓани што спијат под отворено небо.

– Во досегашната теренска стручна работа со оваа целна група не е направено некое посериозно темелно истражување, со кое може да се даде конкретна бројка на сумарна статистика за оваа социопатолошка појава. Не е за занемарување фактот на позитивен тренд на растење на оваа појава, што директно покажува дека сè повеќе и повеќе осиромашува македонскиот граѓанин. Од неофицијални извори се калкулира со бројка од околу 500 бездомници на територијата на градот Скопје – информираат од Црвениот крст на Град Скопје.

Токму поради најавените високи температури што се очекуваат во летниот период, а во обид да им помогнат, тимовите на Црвениот крст на Град Скопје и ова лето ќе се обидат да им пружат помош на оваа ранлива категорија граѓани.

– Во согласност со претстојните високи температури како и грижата за здравствената и психофизичката состојба на бездомниците во градот Скопје, во пунктот за бездомници во Момин Поток на располагање ќе биде мобилниот телефон 071/223-972 за дојави на бездомници што се погодени од топлотниот бран. Мобилните екипи што се достапни и кои ќе функционираат при екстремно високите температури, се составени од лекар и парамедик, кои одблиску ќе им пружаат помош и поддршка на бездомниците со дистрибуирање на вода, мерење на крвен притисок, како и за потешките и интервентни случаи ќе биде обезбеден и транспорт – информираат од Црвениот крст на Град Скопје.

Инаку, Пунктот за бездомници што функционира веќе 14-та година нуди повеќе услуги за лицата што немаат свој дом и има за цел да овозможи тие да ги остварат основните човекови права и да се реинтегрираат во општеството. Истиот е финансиски поддржан од Градот Скопје и повеќе компании и граѓани.